Christmas Ih Cih.....

Nang aa dingin koi bang…?

Khat khat te’ aa dingin hih bang hi mawk ve ee….
· Tate deih, nget teng pia, leisak kul ahih manin ……………. Lungkham pawi
· Mi silh nik leh puan ki deih gawh ahih manin ……………... Lungsiat pawi
· Zu le sa tawh ki diah ahih manin …………………………… Lung-am pawi
· Gual ki ban, ki zem zolo ii hih manin ……………………… Lungneu pawi
· Ih khua tek ki ngai in ki phawk ahih manin ………………… Lunglen pawi
· Lawmngaih ten khua hong ciah san ahih manin ……………. Lungzuan pawi
· Ih zeek ding sum ki cinglo ahih manin ……………………… Lungbuai pawi
· Deih zah sangin hun sau thei zaw ahih manin ………………. Lungduai pawi
· Mi kitawng zong tam ahih manin …………………………… Lungso pawi
· A ki zem, a mel hoih hong tam ahih manin …………………. Lungkaat pawi
· Accident tam thei ahih manin ……………………………….. Lungngiah huai pawi

Christmas ii deihna tak tak akan nuam,
Sia Nangpi

Zi ten na theih dinguh Pasal te thu pawlkhat

1. Pasal te pen bangmah a hih loh uh hang, Pasal ahihna ngiat uh suang pha mahmah uhhi. (A man is proud to be a man).
Ø Numei pil na hih uh leh na pasal te uh zahtak zaw un, sai la la se lo iin “tua ci zaw leng” cih bangin cian pia zaw in.
2. Pasal ten inn nasep kin mello uhhi. A pua lam vaak ding bel sawk kullo ding hi.
Ø Innsung vai kuangsawp, puansawp, tate puah cih bang Pasal ten numei na sep in ngaih sun thei uhhi. Kam khum tawh na zol siam nak leh bel Pasal te pen ‘bawng’ a bang hi aa, hong sem buatbuat pah lel ding uhhi.
3. Pasal ten numei te a tawntung in ki puah sitset leh deih uhhi.
Ø Pasal nei khin na ngawn ing ci-in sam hiat nawn se lo, ki puah se lo, ki sil melmel lo cih khawng te Pasal te lung kiat na te hi.
4. Sex lam ah Pasal te pen muhna, zakna bek tawh zong om mawk thei nawn lo uh aa feeling kah pah thei uhhi.
Ø Numei ahih leh lawnna, khoihna (touching) pan in feeling pan diakdiak uhhi.
5. Buaina (problem) a om leh zong Pasal te khuak(brain) uh zang aa, hong ngaihsun phot ding uhhi.
Ø Numei te ahih uh leh lungtang (heart) zang uh aa, lungkia pah, linglawng pah in buai tengtung thei uhhi.
6. Ki itna lah na ding in ‘sex’ pen pasal te lunggulh masak pen hi.
Ø “Ut khan gee”, “kin khan gee”, “den keei”, cih bangin nial se ken. Haksat pak na a om leh zong hoihtak gen inla a lungkim bangin om sawm in. A ci uh hong dam zaw ding hi.
7. Pasal te a khialh na uh a om leh zong ahih theih zah ciang mai sak sawm in. Hap la la ken, mi zaak ding khawngin aawt san zakzak ken.
Ø Aw nel tak tawh na deihlohna te ‘tua bang hi’ ci zaw in. Pasal te zum leh a mit un khua mulo hi.
8. Vai ciah ahi zongin khualzin hong ciah ahi zongin inn ah om sawm hamtang in. Maitaai tak in na Pasaln, na lawmpa vai dawn le cin a gimna teng veng pah ding hi.

9. Kitotna, ki nialna a om khak leh zong a heh zaw, a so zaw in pang kei in. A khut hong zial hen la, a khe hong piik leh bawhlung na bang lel ding hi.

10. Na hih theih zah in mai tai sawm den in. Inn kuan sung buaina a om ta teu zongin mai gum sak den kei in.
Ø Na lawmpa a vak na khawng ah a muh numei te a mai uh taii zaw ahih manin inn a mai gum den nu sangin a maitaii te tung a lungsim, amit uh tu zaw ding hi.

11. Pasal ten “Numei’ huh” cih khawng deih lo uhhi.
Ø Ki Pasal sak tentan thei uh aa, nang kiangah zong huhna hong ngen lo kha mah ding uhhi. Na hih theih zah in panpih sawm hamtang in. Bangzah tak a gilo mahmah Pasal khat pen a lawmnu ii thusiamna (tender loving care) lunggulh ve ve hi.

Hih a tung aa thu te pen a diakdiak in “NUPA” te’ aa ding a aituam in ka gelh ahi hi.
Pasal te’ taang-in,
Sia Nangpi

Taangval te na theih ding uh thu pawlkhat

Ei taangval te pen ii kum a cin nak leh lawm ngaih ding pen ii maban khat ahi hi. Lawm ngai theilo te mi bang lo a hi uhhi. Ih lawm ngaih te tawh innkuan suah ding zong Pasian deihna hi. Tua ahih manin nungak te hong pahtaak ding na ut leh hih te na theih sawm dih ve….

1. Nungak te tawh na ki kholh ciang a ki sap veva kei buang leh khoih supsup, neh supsup se dah in. “Khut thak pa” hong ci ding uh aa hong lau, hong kihta ding uh hi. opportunity ki khak tan thei hi.
2. Numei te zahtaak bawl in. Amah a kin bawl leh a thusim te numei te’n paak ta mahmah uhhi. Hoih tak in hopih sawm in.
3. A ki taangsapna te ah na hih theihzah in huh in. Hong sap leh zong a hunlap in tun theih sawm in, nang hong muang mahmah ding uhhi.
4. Amah (hoih na sak nu) tawh na ki tuah khak ciangin, “nuihmai” hiuhiau den in, na mel siatna teng veng ding aa na taansiat te zong hong mu lo tuam ding hi.
5. Amah tawh na ki kholh leh zong, nuam na sak thu te gen inla mai lam ah zong ki muh kik ding na ut zia te genpih zel in. Tua ni nang sangin ngaklah zaw thei mai ding hi.
6. Sang kah lain a hih leh pil sawm in. Na sep nein a hih leh cih tak in, zulhtat ken. A ciim, a tei, a citak te numei te’n paak ta uhhi. Ahi hangin kiphat vet ken. Numei te’n zadah uhhi.
7. Sam sau zialzual cih khawng, bilbah peuh bulh liapluap cih peuh, tatoo om neinai cih khawng numei te’n en thei vet lo uhhi.
8. Na neih sunsun silh ten siang sitset henla, sam hiat zilzial kawm in om peuh le cin na mel ahoih luat loh hangin na mat kah ve ve ding hi.
9. Na ki main gap khit ciang zong a khut let ding, kawi ding, nap (kiss) ding cih te nangawn a khuan ngen zel in, hong muang mahmah ding uhhi.
10. Na ki kholh sim un ciam nuih cih khawng thu tuamtuam khawng gengen nui saksak le cin a lung uh nuamsa mahmah ding uh aa hong cimtaak vetlo ding uhhi.

Taangval te aw, ei pasal ten bel numei te a mel hoih, a body hoih cih bang a pua lam sang ii en zaw hi. Numei te ahih uh leh ii lungsim leh ii muanhuaina, ii cihtakna cih bangin ii sunglam muhtheihloh hong en zaw uh ahih manin ii mel ki pia veuvau ta kei zongin ii lungsim beek hoih sawm ni. Mimuan ding in om sawm ni.

Deihsakna lianpi tawh,
Sia Nangpi