KIPUMKHATNA

(Thuhilhkikna 4:9-12)

Kipumkhatna pen mihingte nuntakna sung bekah hi lo-in gamlak sing kung lopate nangawn sungah zong a kuul leh a ki sam ahi hi.Gamlak ganhingte a bawngbawng, a nannam mahin ki thuah uh a ,van aa leng vasate zong a namnam mah in leng khawm liai liai, giak khawm liai liai uh hi.Gamlak ah sing kungte zong honpo,khawlpo khawm uh hi.Kipumkhatna pen ki pawlna khat peuhepeuh ah thupi ka sa hi.Mangte paunak: "Unity is Strength,"Ki pumkhatna in thahatna hi.Khat guak tawh na lianpi,na thupi ki sem zo lo a kipumkhatna leh kithutuahna tawh sem khawm liai liai na in gualzawhna hong ngah sak tham lo in, khat guak sepna sangin mui bun zaw lai hi.
Zomite paunak ah:"Nupa ki lung tuak khua khat in zo lo, khua khat ki lung tuak khua kua in zo lo; sing khuah khat guak kuang thei lo, pasal khat guak innsuang zo lo,"na ci uh hi.
Hihlai ah Zomi Spicer innkuan in ki thutuak in nasem khawm mapang khawm zen leng mite'n ong sim mawh lo in, mite' etteh tak cing ki suak ding hi.Kipumkhatna pen ih Pu ih Pa ten zong thupi na sa in la bang na phuak uh hi.

(A)Tung ciang solkha vaang tang ih cih,
Si-al zep (kop) a vang tang no aw ee
(B)Ih khang ciautui luang ging ih cih,
A kaih tam a luang ging no aw ee

Hih la a khiatna pen zaankim lai a solkhapi taang zongh a mah bek taang zohi sam lo in, a kiim a paam a aksi tampite tawh hong ki gawm ciangin taang pempam zo bek hi.Lui tui luang ging zuahzuah te zong naak tampi hong ki gawm khit ciangin a gin hong ngaih pan hi a cihna hi.Ei Zomi Spicer innkuan te zongh khapi leh aksi ki gawma a taan khop bangin leh luituite ki gawma a luan khop bangin ma pangkhawm leng namdangte lak ah ih vaang taangin, Ih gin hongngaih ding a, mite zahtak leh liimbelh ih suah ding hi.

Tg. Dothang

BA N G H A N G I N K I K H E L D I N G K I S A M?

Leitung aa om na khempeuh in amau hunleh ni te zui-in kikhel in ki peei ciat uh aa, sun om mah bangin zaan ong tung zeel hi. Gul te zong a vun uh laih (lii kik) zel uh aa, a lui te nusia in a thak nuntak na tawh nungta kik zel uh hi. Sing kung zong ih phuk ciangin a bul pan in ong sel kik zel aa, a thak ong ki pan kik zel hi. Tua mah bangin mihing te nuntak na ah zong kikhel theih ding thupi aa, tua mah bangin khantohna ih cih ciangin ih sepsa khat sangin a hoihzaw leh a ki banglo a sep theihna hi aa, tua in ki khelna hi pah hi. Tua bang a kikhel te lak ah thupi ka sak leh ka deih vasa khat thu them ong gen nuam ing.

Muvanlaai te in amau nam lak ah kum sau a nungta pen hi aa kum 70 ciang bang nungta thei uhhi. Ahi zongin tua tan ciang a nuntak theihna dingun Muvanlaai in a haksa khentatna tampi ong nawk kul hi. Kum 40 aphak ciangin a cinn te sau in kauh aa sa manthei nawn lo iin, a muk te zong sau in kawi ta aa sa zong hoihtak ne thei nawnlo aa, a lenna ding kha te zong teekta in a pum tung ah belh cip a zaangtak in leng thei nawn lo hi. Tua laitak in Muvanlaai in teel ding nih bek ong nei hi: tua ci bang in si ding maw… a hih kei leh ni 150 sung a sawt ahaksa leh ana thuak in a nuntakna zomto suak ding maw. ??cih bek tel ding om hi. Muvanlaai zong mualsangdawn ah lengto iin abuu sung ah ong tu hi. A teekta a kawi amuk suangtung ah a kiat dong ong taatkhia kul hi. A tang, a thak amuk ong po kik ding a ngak kawm in a kawi, akauh a cinn te zong suangtung ah ong kiatkhia hi. A thak cinn leh muk ong po kik khit ciangin a teekta akimat cip akha te khat khit khat ong botkhia hi. Tua zawh kha nga khit ciangin a minthang Muvanlaai in a nuntakna a thak in ong ki pan kik aa, kum 30 ong nuntak beh lai hi.

Tua mah bangin ei mihing te zong ih nuntak sungah sau vei ih nuntakna ding leh gualzawhna ih ngah theihna dingin ih laak ding khensatna leh haksatna tampi ih phukha zel ding hi. Na gualzawh theihna dingin na nasepna leh annek ngeina na kuangte, koi ci bangin na sem aa an zong cih te ki en pha aa akawi, athep aa na ngahna ahih leh na ki puah kul ding aa, tua te na botkhiat kul ding hi. Na lenkawm in na mattheihna dingin a teek a kawi na cinn te na hiap zum, na tangsak kul ding hi. A kisap leh zong na botkhiat kul ding aa, ana zong na thuak kul mai kha
ve….gualzawhna ding a ki sam hi ei… A san na mun ah na len theihna ding, zaangtak aa na len theihna ding in a ki lomcip, na neih den a ki khuhcip na kha te zaal aa a kisap leh alui na kha te botkhia iin, khathak ong po kik dong na ngak zong kul mai thei. Muvanlaai mah bangin nang zong hun pawlkhat sung nangbek om in nuntakzia te leh bang ci bangin kikhelna tawh khantohna leh gualzawhna ngah thei ding cih hoihtak ngaihsut ding zong ki sam hi. Khat veivei nang kia hunzang aa ana na thuak kul hun zong om kha thei ding a tua bang hun khit ciangin zong thathak la aa a sang na mun pan in haat-tak aa len na dingin energy khol kul hi.

Tua hi aa khantohna ding leh gualzawh matutna ding, khansawt nuntakna ding in ih ki khel kul aa, ih nunlui zia te khel ding tampi om thei hi. Tua hi aa a diakdiak in nuntak sauna ding gualzawhna ding bek hilo nuntak tawntungna ding in na nunzia leh na gamtatna te na khel kul aa, na sep ngei, na bawlngei te na paihkhiat kul hi.

“Ki khel theihna in khantohna khat hi aa, ki khelna a nei theilo mi in gualzawhna mungtup tawh a ki gamla mi te hi”

Tg Khaineu....